Til hausten skal dei fleste ungdomsskuleelevane i Suldal samlast på ny ungdomsskule på Sand. I samband med dette har alle i 9.klasse denne veka vore på leirskulen for gode felles opplevingar og relasjonsbygging. Me har bl. a. vore på Gullingen (979moh), fiska i Mosvatnet og vore i bekkevandringsbekken.

Mange bilde og elevlogg frå veka finn du her.

Torsdag denne veka kunne elevane på leirskulen velje mellom tre ulike fjellturar. Dei aller fleste, 42 i talet, valte å gå den lengste, til sjølvaste Gullingen (979moh). Dei andre gikk på fisketur (det blei fisk) og til Såto.

Du kan lese logg frå veka og sjå bilde her.

Foldrøy og Svortland skule frå Bømlo fekk oppleva naturen kring Gullingen på sitt beste denne veka, og nettopp fjelltoppen Gullingen var det fleire som fekk oppleva på nært hold på langturdagen.18 elevar svetta, sleit og smilte seg opp dei lange bakkane til topps, 979 m.o.h., kor resultatet vart ein eineståande utsikt. Andre drog på fisketur og endeleg vart det storfangst, heile 12 flotte aurar drog elevane på land. I fuglekassane våre er det for tida stor aktivitet,egga er klekka og det yrar av liv i reiret.

Bilder frå veka finn du her

Porsholen, 6. kl. og Sandeid, 7. kl. har hatt gode dagar i heia, og dei har synt stor interesse for å oppleva Suldalsnaturen. Det viste særleg påmeldinga på dei valfrie turane me hadde på torsdag. Heile 30 elevar ville på langtur. Det er mykje fuglelåt i skogen no, og det gjer ein ekstra dimensjon til turane våre. Mange elevar vil nok kjenne att løvsangaren neste gang dei tek seg ein tur ut i skog og hei. Dei som valgte å liggja ute i lavvu, vakna nok tidleg til gauken som er særleg aktiv no i desse dagane.

Bilder og logg finn du her.

Teinå skule 8. kl fekk ei leirskuleveke med god sommarvarme. Sjølv om vanntemperaturen var heller vinterleg, frista det likavel nokon av elevane til å ta seg ein dukkert. Endeleg fekk me komme i gang med årets første fjellfisketur, noko som tydeleg var populært blant mange. Resultatet blei noko magert, men me lurte no opp 2 aurar. Elevane fekk òg oppleva mykje god kulturhistorie på ferden opp i fjellet med spor etter vikingtid og stølstida.

Fleire bilde og logg finn du her

8. klasse frå Sand-, Marvik-, Erfjord-, Jelsa- og Vinjar skule fekk 3 gode dagar på Gullingen leirskule. Til hausten skal dei gå saman på ungdomskulen på Sand og me håpar at alle dei gode opplevingane her oppe har skapt nye gode relasjonar mellom ungdommane. Me har hatt fjelltur til Såto, kanopadlig på Mosvatnet i heftig snøvær og kulturhistorisk vandring før me avslutta opphaldet med bekkevandring i Stavastølsåna.

 Fleire bilde og elevlogg finn du her.

Då er våren i gong for fullt på leirskulen. Saman med sol har 6.kl. frå Aspervika skole gjesta oss. Me har buldra, grilla fisk, orientert, padla, vore på toppar og meire med. Ikkje minst må bekkevandringa nemnast, der var det verkeleg liv og spetakkel.

Elevlogg og mange bilde frå veka finn du her.

5 elevar og 3 vaksne frå Madlavoll ATO fekk ei leirskuleveka med godt ver og mange gode opplevingar. Me starta med ein tur i skogen kor me nytta saccovogna for å få fram rullestolbrukar. Med mange gode hjelparar fekk me køyrd vogna til Mosvatnet kor kanoane tok oss ut til fiskegarna. Stekt aure gjekk ned på høgkant. På fjellturen fekk me hjelp av dei firbeinte hjelparane våre (5 huskyar) til å trekke vogna og bakkane opp til heia gjekk som ein lek for alle. Ute i terrenget sansa me våren med bekkelydar, heftig fuglekvitter og isras i dei stupbratte fjellsidene.

Fleire bilde frå veka finn du her.

Tysdag var siste sjanse for dei som ville ha seg ein skitur på leirskulen. Og sjølv om det hadde smelta godt helga før, var det stadig nok snø til skileik. Dei andre dagane blei det kanopadling og fjellturar i ganske mykje vêr. Og aure, det fekk me til gangs på garna.

Logg og bilde frå veka finn du her.

Ei ny veke har tatt slutt på leirskulen. Mange nøgde () elevar tok farvel etter aktivitetsrike dagar. Me har alle vore på ski til Langeli. Lengre skitur har det og vore for nokre, mens andre var på fottur til Såto. Ein dag var og ei gruppe på skogstur inspirert av Lars Monsen "Utan grenser".
"Eksamen" no i dag viste at elevane hadde lært mykje: førstehjelp, kulturhistorie, kart og kompass, skistell og meire med.

Logg og mange bilde som viser aktivitet frå veka finn du her.